Чудото од три децении: Како Мицкоски ја откри топлата вода и ни подари… учебници!
Стискајте ги палците, граѓани, и избришете ги солзите радосници! На првиот училишен ден, премиерот Христијан Мицкоски свечено нè извести за најголемиот цивилизациски и технолошки подвиг во историјата на независна Македонија: децата во училиштата конечно добиле учебници. По неколку децении напорна работа, длабоки мисловни процеси и ласерски прецизни анализи, Владата на ВМРО-ДПМНЕ успеа да го реши енигматскиот проблем што мачеше генерации — достави хартиени книги во училишните клупи.
Премиерот, со препознатливиот драмски патос, не пропушти да нè потсети дека до пред некоја година ова претставувало чиста „мисловна именка“. Затоа што, да бидеме реални, да отпечатиш книга во 21 век е рамно на испраќање приватна ракета на Јупитер. А за сите оние што се дрзнуваат да прашаат зошто ова се слави како слетување на Месечината, Мицкоски веднаш ја лоцираше вината кај „талогот“ — таа дежурна, мала група критичари кои безрамно одбиваат да аплаудираат на секојдневните владини чуда.
Но, не се секирајте, преродбата не застанува тука. Додека училишните покриви прокапуваат, а парното е постојано под знак прашалник, Владата веќе најавува базени, спортски сали и реконструкција на над 50 објекти. Затоа што ништо не вели „образовен рестарт“ така добро како база во кој учениците ќе можат да пливаат додека чекаат да се поправат 35-те години „системско уништување“. Затоа, поклонете се пред реформата: учебниците се тука, а за сè друго — крив е талогот!
