Политичкиот хаос и долгогодишната криза во скопскиот јавен превоз добиваат нова драматична епизода. Откако со години скопјани беа заложници на партиски блокади, распаднати автобуси и сообраќаен колапс, опозицискиот СДСМ излезе со жесток фронтален напад врз градоначалникот на Кисела Вода и функционер на ВМРО-ДПМНЕ, Орце Ѓорѓиевски. Од градската организација на партијата обвинуваат за невиден политички цинизам и потценување на интелигенцијата на граѓаните, посочувајќи дека истиот систем за брз автобуски превоз (БРТ) кој со години беше прогласуван за „лош и криминален“ од страна на ВМРО-ДПМНЕ, денес наеднаш се промовира како нивно големо достигнување.
Во продолжение ви ја пренесуваме изјавата за медиуми на Александар Давчевски, Претседател на Градската организација на СДСМ, во целост и интегрално:
Врв на лицемерие – 5 години ВМРО го блокираше проектот на СДСМ за БРТ за сега Орце да се фали
Изјава за медиуми, Александар Давчевски – Претседател на Градска организација
Денес сме сведоци на врвот на политичкото лицемерие, безобразие и потценување на интелигенцијата на граѓаните на Скопје.
Орце Ѓорѓиевски без ниту малку срам, застанаа пред камерите да се пофали со отпочнување на постапката за реализација на проектот БРТ. Истиот оној систем за брз автобуски превоз кој тие со години безмилосно го саботираа, го блокираа во Советот на Град Скопје и го прогласуваа за „лош и криминален“!
Цели пет години! Пет години скопјани мрзнат по постојки, се туркаат во распаднати автобуси, доцнат на работа и на училиште, само затоа што ВМРО-ДПМНЕ одлучи да си игра политика со нивните животи. Пет години го држеа во заложништво јавниот превоз на половина милион луѓе, за денес – преку ноќ – истиот тој проект да се обидат да го продадат како свое историско достигнување.
Да бидеме на јасно: БРТ е визија, идеја и проект на СДСМ. Ние го изработивме и го започнавме како рационално решение за спас на Скопје од сообраќајниот колапс. Ние никогаш нема да бидеме против реализацијата на БРТ. Но, ние сме згрозени од ова политичко лицемерие. Оние кои фрлаа дрва и камења по овој проект и направија сè за да го закочат, денес се китат со туѓи перја.
Зарем власта мисли дека скопјани имаат толку кратко памтење? Зарем градоначалникот мисли дека со една прес-конференција ќе ги избрише годините малтретирање на граѓаните?
Скопјани го бараат единствениот логичен одговор: Кога лажевте? Дали кога пет години го блокиравте БРТ по секоја цена за политичка штета, или денес кога наеднаш овој проект стана совршено и квалитетно решение само затоа што вие сте на власт?
Ова не е грижа за градот. Ова е класично малтретирање на граѓаните со скап пи-ар!
Времето кое скопјани го изгубија поради вашите блокади, никој не може да го врати.
Линк до видео:
